Glðilegt nýtt ár úr Verstöðinni.

Moren. Blíðan hér undanfarna daga er með ólíkindum. Veðrið á gamlárskvöld var hreint út sagt frábært. Eiginlega of mikið logn, því púðurreykurinn lá yfir bænum langt fram á nótt. Mikið var sprengt og björgunarsveitarmenn eru ánægðir með söluna.

Flotinn fór á sjó í nótt. Togskipin lönduðu flest 30 des og voru með þetta 20-30 tonn af blönduðum fiski. Suðurey var eina skipið sem landaði á gamlársdag. Gummi Lalla í síðasta túr, Pétur Andersen tekinn við. Til hamingju Pétur og gangi þér og þinni áhöfn vel í slarkinu. Held að stóru dassarnir ætli í gulldepluleit, því ekki bætir Hólabiskup við síldarkvótann frekar en þorskinn og ufsann, bara skötuselinn fyrir sérstaka vini sína.

Kveðja Valmundur

Mótmæli sjómanna í Verstöðinni

Í gærkvöld var fjölmennur fundur sjómanna í Alþýðuhúsinu og voru menn heitir. Kom fram ríkur vilji að taka höndum saman við útgerðarmenn og sigla flotanum í land til að mótmæla aðför stjórnvalda að íslenskri sjómannastétt og útgerðarmönnum.

 

Vestmannaeyjum 30 desember 2009

Ályktun frá fundi sjómanna í Vestmannaeyjum.

 

Sjómenn í Vestmannaeyjum fordæma aðgerðir stjórnvalda í þeirra garð harðlega og krefjast þess að stjórnvöld dragi til baka afnám sjómannaafsláttar og útflutningsálag á óunnin fisk.

Á fundinum sem var mjög fjölsóttur, kom fram skýr vilji sjómanna til samstöðu og aðgerða gegn ofantöldum aðgerðum stjórnvalda.

Sjómannaafsláttur hefur verið órjúfanlegur hluti af kjörum sjómanna undanfarin 55 ár. Nú hafa stjórnvöld ákveðið að slá hann af án nokkurra bóta. Þessa ákvörðun fordæmir fundurinn harðlega.

Sjómenn taka á sig skattahækkanir eins og aðrir launamenn en taka á sig mun meiri kjaraskerðingu en aðrar stéttir með afnámi sjómannaafsláttarins.

Sjómenn Íslands skorast ekki undan ábyrgð í þeim þrengingum sem fram undan eru hjá Íslenskri þjóð. Þeir munu nú sem áður leggja líf og limi í hættu, vera fjarri ástvinum megnið af árinu og standa sína plikt.

Öllu tali um forréttindi og breyttar aðstæður sjómanna við Íslandsstrendur er vísað til föðurhúsanna.

Sjómenn nota almannaþjónustu minnst allra stétta.

Fjarvistir frá heimili hafa aukist hin síðari ár og standa í lengri tíma en áður.

Læknisþjónusta við sjómenn hefur verið skorin niður við trog að undanförnu og útlit fyrir að ekki verði hægt að kalla út þyrlu alla daga ársins, og hve langt út á haf er óvíst.

Á sama tíma og ráðist er að kjörum sjómanna er ekki hróflað við skattfrjálsum dagpeningagreiðslum eða öðrum hlunnindum sem útvaldir skattgreiðendur njóta.

Sjómenn munu ekki una því að ráðist sé að kjörum þeirra með þessum hætti.

 

Fundurinn mótmælir því harðlega að sjávarútvegsráðherra hafi sett 5% útflutningsálag á óunnin fisk.

Fyrir sjómenn í Vestmannaeyjum þýðir þetta að heil áhöfn missir vinnuna.

Barátta sjómanna og útgerðarmanna í Vestmannaeyjum til margra ára, að fella niður þessi fáránlegu höft, er fótum troðin og okkur sýnist að þessari aðgerð sé sérstaklega beint gegn útgerðinni og sjómönnum í Vestmannaeyjum.

Fjölmennur fundur sjómanna í Vestmannaeyjum fordæmir harðlega aukaúthlutun sjávarútvegsráðherra á skötuselskvóta og reglum um úthlutun  hans.

Með þessari gerræðislegu ákvörðun sendir ráðherra sjómönnum og útgerðarmönnum í Vestmannaeyjum kaldar kveðjur. Rök hans fyrir þessari ákvörðun eru jafn fáránleg og ákvörðunin sjálf. Meginrökin, að skötuselur veiðist nú víðar en fyrir sunnan land, halda ekki vatni. Það er nefnilega svo að skip hafa vél og skrúfu til að komast milli staða eins og fiskurinn hefur sporð til þess sama.

 

 

         __________________                                                 ­­­­­­­­­­­­­­­­­­­­­­­­­­­­­­______________________

             Bergur Kristinsson                                                        Valmundur Valmundsson

 

Svo í lokin óska ég íslenskum sjómönnum hamingju á nýju ári og þakka það gamla.

 

 

 

 

 

 

 

Ákall til sjómanna í Verstöðinni

Sjómenn Vestmannaeyjum, boðað er til opins fundar í Alþýðuhúsinu kl. átta í kvöld.

Næg eru fundarefnin.

Sjómannafélögin í Vestmannaeyjum.

Kalt í Verstöðinni, topparáðningar og traust.

Í morgun var smá spjall um ,,nýju,, mennina í bönkunum. Fannst mönnum það skjóta skökku við að gamlir jálkar sem hafa ráðið öllu, dásömuðu útrásina og sigldu okkur í strand, eru ráðnir í æðstu stöður.

Ekki myndi útgerðarmaður ráða aftur skipstjóra sem hefði siglt einni skútunni hans í strand og iðrast eigi heldur rifið kjaft og haldið því fram að radarinn og kompásinn hafi verið bilaðir. Þó var sigld full ferð í þokunni og brælunni.

Er ekki komið nóg af svona vitleysu. Grunnurinn  að góðri samvinnu til sjós er traust. Ef traust er til staðar gengur allt upp. Þetta traust vantar í heimi stjórnmálanna, þegar það kemur eru okkur allir vegir færir. 

Þess vegna segi ég við pólitíkusana, búið til þetta traust fyrir okkur og þá skulum við taka slaginn með ykkur og þið með okkur til að vinna okkur út úr þessari vitleysu sem örfáir menn komu okkur í.

 Svo er félagsfundur í Alþýðuhúsinu kl. átta annað kvöld og allir að mæta.

 

Mokhríð í Verstöðinni

Góðan dag.

Heldur betur vetur núna. Það hefur snjóað með köflum síðan í morgun en frostið hefur linast síðan í gær. Gaman hjá krökkunum á Stakkó og víðar um bæinn.

Aflaverðmæti á Íslandsmiðum jókst um 21% fyrstu níu mánuði ársins og verður þetta besta ár til sjós í langan tíma. Þrátt fyrir loðnubrest og minni kvóta í nánast öllum tegundum. Sem er náttúrulega þvæla þegar litið er til reynslu sjómanna um allt land. Hugsið ykkur ef tekið væri mark á þeim sem gerst þekkja um ástandið á miðunum.

Áfram sjómenn, sem aflið gjaldeyris þegar þörfin er mest.

Ekki lítur vel út með loðnuna á komandi vertíð. Fræðingarnir hafa gefið út að engin loðna hafi fundist í haustleiðangrinum. En sjáum til, kæmi ekki á óvart þó eitthvað fyndist eftir áramót, sem kastandi væri á.

Togskipaflotinn er mest allur á sjó, heldur dræm aflabrögð að mér skilst.

Annar í Jólum og áti.

Jólamoren.

Einhversstaðar sagði ég frá því af hverju ég segi ,,moren'' í upphafi greina. Gömlu rollukallarnir á Sigló, þar á meðal afi minn Óli Eiríks heilsuðu ætíð á morgnana með þessari heilsu. Eflaust er þetta komið úr dönsku en er samt gott til heilsu, betra en hæ.

Sama blíðan alltaf hér í Verstöðinni og sést til sólar. Fór í Hressó í morgun og hitti þar fríðan hóp sem var að hlaupa af sér jólaspikið. Kom heim og setti litlu afaskottuna í vagninn og út að sofa. Mikið vildi ég eiga nógu stóran vagn til að sofa í úti eins og börnin.

Hangikjötið í gær og sviðasultan var frábær matur. Og svo fengum við sent sauða hangilæri austan af Jökuldal. Sem er toppurinn, hvílíkt hnossgæti.

Megnið af togbátaflota Eyjamanna fer á sjó um miðnótt og fá gott veður sýnist mér og vonandi ná menn í gullgáminn.

Minni á ALMENNAN FÉLAGSFUND HJÁ JÖTNI MIÐVIKUDAGINN 30 DES KL. 20:00 Í ALÞÝÐUHÚSINU þar förum við yfir málin og skiptumst á skoðunum um okkar mál. Léttar veitingar á eftir.

 

 

Gleðilega hátíð úr Verstöðinni.

Hér er friður og ró yfir öllu. Veðrið frábært og minnstu borgararnir eru að leika sér í snjónum. Tími jólaboðanna er runninn upp og allir fara saddir að sofa í kvöld.

Hér er ályktun stjórnar og varastjórnar Jötuns frá 22. des.

Vestmannaeyjum 22 desember 2009

Ályktun um niðurfellingu sjómannaafsláttar.

Stjórn og varastjórn Jötuns Sjómannafélags, mótmælir harðlega fram komnum og samþykktum tillögum Ríkisstjórnar Íslands um afnám skattaafsláttar til sjómanna á Íslandi.

Í aldaraðir hafa sjómenn þessa lands fært afla að landi, landslýð til léttis í bjargarleysinu. Sjómenn Íslands skorast ekki undan ábyrgð í þeim þrengingum sem fram undan eru hjá Íslenskri þjóð. Þeir munu nú sem áður leggja líf og limi í hættu, vera fjarri ástvinum megnið af árinu og standa sína plikt, munu áfram draga björg í bú hvað sem tautar og raular. Í ljósi þessa er ákvörðun Alþingis um afnám sjómannaafsláttar, algerlega úr öllum takti og skilningur alþingismanna á starfi sjómanna Íslands lítill sem enginn.

Öllu tali um sérréttindi og breyttar aðstæður sjómanna við Íslandsstrendur er vísað til föðurhúsanna.

Sjómenn nota almannaþjónustu minnst allra stétta.

Fjarvistir frá heimili hafa aukist hin síðari ár og standa í lengri tíma en áður.

Sjómennska er eitt hættulegasta starf á Íslandi.

Læknisþjónusta við sjómenn hefur verið skorin niður við trog að undanförnu og útlit fyrir að ekki verði hægt að kalla út þyrlu alla daga ársins, og hve langt út á haf er óvíst.

Þessi upptalning sýnir svo ekki verður um villst, að sjómannstarfið er enn hættulegt og krefjandi starf sem verður að meta að verðleikum þegar kemur að útdeilingu lífsgæða til almúgans.

Jötunn minnir á að skattaafsláttur til sjómanna er lægstur á Íslandi af öllum Norðurlöndunum. Við sem þjóð, stólum þó mest á sjávarútveginn til tekjuöflunar, af þessum þjóðum öllum.

Jólakveðja frá Eyjum, Valmundur

 

 

 

 

Gleðileg jól úr Verstöðinni

Moren á aðfangadagsmorgni. Eins og greint var frá í gær, snjóaði hér í Eyjum og nú er allt hvítt og fallegt. Birtan kemur fyrr og varir lengur og allt umhverfið er einhvernveginn hreinna.

Nú sit ég við tölvuna og pikka inn en barnabarnið fékk að opna einn pakka og leika sér, horfir svo á barnaefnið í sjónvarpinu þess á milli, til að stytta tímann fram að stóru stundinni.

Við hjónakornin röltum í bæinn í gærkveld og ekki var að sjá annað en allir væru komnir í jólaskap í snjónum. Kaffihúsin full af fólki að fá sér gott í kroppinn, kakó og eitthvað meira, eins og gengur. Ekki var vín að sjá á nokkrum manni, það var öðruvísi hér áður fyrr þá voru menn slagandi í leit að passlegum náttkjól á konuna!

Allur flotinn er bundinn við bryggju, fagurlega skreytt skipin lýsa upp skammdegið, stund milli stríða. Áhafnir og fjölskyldur þeirra eru að telja í jólin, hlaða batteríin fyrir næsta úthald. Þeir eru oft strembnir janúar og febrúar á sjónum, langvarandi gæftaleysi og lítið um fisk.

Sjómönnum Íslands og fjölskyldum þeirra óska ég GLEÐILEGRA JÓLA sem og landslýð öllum.

Þorláksmessa með fnyk.

Moren. Hvað haldið þið? Það snjóar í Verstöðinni, allt orðið hvítt. Mikið er þetta jólalegt, svona á jólaveðrið að vera.

Skötulyktin fer bráðum að læðast um heimilin og mikið verður nú gott að gúffa í sig blessaðri skötunni. Vel kæstri og með hamsatólg. Eina skiptið á árinu sem maður fær tólg útá fiskinn. Bölvað kólesterólið. Annars fer mín fjölskylda til Óðins í Klöpp í skötu og hlakka mikið til. Þar verður margt um manninn, enda Klappararnir margir og skemmtilegir eins og allir vita.

Jólafundur stjórnar Jötuns var haldinn í gær. Þar voru mörg mál á dagskrá, m.a. samþykktum við ályktun um sjómanaafsláttinn. Byrti hana síðar í dag hér á blogginu. Svo verður ALMENNUR FÉLAGSFUNDUR MIÐVIKUDAGINN 30 DES. KL. 20:00 Í ALÞÝÐUHÚSINU. Þá verður flotinn kominn í land og við förum yfir málin vítt og breytt. Eftir fund verða léttar veitingar.

Verstöðin, jól í nánd.

Moren.

Allt í góðu hér hjá okkur. Norðanáttin að linast og allir að tínast að landi í jólastopp, þ.e. fram að miðnótt annan í jólum. Þá fer megnið af flotanum að ná í Gullgáminn.

Rauði herinn kom í gær allir með um 30 tonn. Þá eru bara Bergur og Bylgja eftir.

Eitthvað hefur vinur vor www.nilli.blog.isfarið vitlaust fram úr um daginn. Hann skrifar um að vigta verði allan afla hér á landi áður hann er fluttur út. Gott og vel það er hans skoðun. En í athugasemdum segir hann alla vera í svindli, útgerðina, vigtarmennina, fiskistofu, lögguna og sýslumennina, þá hljóta sjómennirnir að vera með eða eru þeir skynlausar skepnur sem taka ekki eftir neinu, ótýndir glæpamenn segir Nilli.

Algerlega órökstuddar fullyrðingar og hafi hann skömm fyrir, svo taka einstaka rugludallar undir með honum. Þessir menn vita greinilega ekkert í sinn haus um útflutning í gámum.

Við Eyjamenn erum stoltir af árangri okkar í gámafiskinum og ég get lofað ykkur því að vel er fylgst með og vel að málum staðið. Sjómennirnir vita nákvæmlega hvað þeir eru að fiska og hvað fer inn í gámana og hvað kemur út úr þeim úti. Eða heldur Nilli því fram að sjómenn séu að svindla á kerfinu með því að gefa upp færri kíló og hafa þar af leiðandi lægra kaup.

Er sammála Nillanördum um eitt, það er allan fisk á markað. Fyrir því hafa sjómannasamtökin barist í áraraðir. Svo ætti að leyfa Tjöllunum og Germönunum að bjóða í á móti okkur hér heima. Þá myndaðist ,, rétt '' verð held ég. Annars er rétt verð afstætt hugtak sem lengi má rífast um.

Annars gott fólk segjum við Gleðileg jól héðan úr Verstöðinni.