Verstöðin á miðvikudegi.

Moren.

Blessuð blíðan alltaf hreint. Kallinn grillaði í gær á svölunum. Gullberg landaði í morgun 65 tonnum mest þorskur. Suðurey var með fínan afla 65 tonn blandað að austan.

Loðnukallar eru ennþá rólegir þó inn við beinið vildu þeir vera farnir að fiska og það mikið, en reyna á að hámarka verðmætin og bíða eftir að hrognafyllingin verði næg til að kreista.

Ágætis ýsukropp í Lónsbugtinni hjá togbátunum og einhverjir koma á morgun. Gandí er á netum og þorskurinn er mættur á slóðina 25 tonn í tveimur lögnum lágu hjá Magga og félögum. Brynjólfur leggur í dag. Glófaxi er að gera klárt. Huginn að Deplast.

Loðnan og Eskifjarðarfundur.

Moren.

Fyrsta loðnugangan er nú komin að Þorlákshöfn og hrognafyllingin er orðin 17-18%. Það styttist í að hægt sé að kreista úr þessari göngu. Fréttir berast af loðnu fyrir austan þannig að útlitið er nokkuð bjart í loðnunni. Togbátaflotinn er fyrir austan og er sæmilegt ýsukropp í birtunni.

Eskifjarðarfundur var í gærkvöld. Þar eru nokkuð aðrar áherslur í kvótamálunum en hér. Austfirskir útgerðarmenn eru undir þá sökina seldir að hafa selt frá sér nánast allan bolfiskkvóta sinn en eru sterkir í uppsjávarfiskinum. Sverrir Mar kom réttilega inná að útvegsmenn gætu sjálfir sér um kennt að fólk á þessu svæði og víðar væri á móti núverandi fiskveiðistjórnunarkerfi. Samfélagsleg ábyrgð handhafa aflamarks er mikil. Sumir hafa gengið græðginni á hönd undanfarin ár og hafa selt sínar aflaheimildir og látið sig hverfa með gróðann. Viðkomandi samfélag situr eftir með sárt ennið, verðlausar húseignir og atvinnuleysi. Þetta hefði mátt koma í veg fyrir með 100% veiðiskyldu og bannað væri að selja aflamark. Skila því sem ekki er veitt og aðrir betur til þess hæfir veiði aflann.

Ég minni á að svipað ástand hefði getað skapast hér í Eyjum, en sem betur fer eru útgerðarmenn hér að gera út af heilindum og eru ábyrgir samfélagslega heilt yfir þó alltaf megi bæta í. Við kunnum að veiða fisk, vinna hann og selja og höldum okkur við það og getum gert enn betur ef við fáum frið til þess. 

Sprengisandur

Moren.

Nú er í gangi á Bylgjunni umræðuþáttur um sjávarútveginn. Þar eru nokkrir frummælendur, Friðrik frá LÍÚ, Einar K alþingismaður, Grétar Mar, og Guðbjartur Hannesson formaður nefndar um endurskoðun kvótakerfissins.

Í inngangi kom Grétar Mar inná að sjómenn væru ósáttir með sjómannaforystuna og skoðanir hennar á fyrningarleiðinni. Grétar tekur helst til stórt uppí sig finnst mér. Hér í Eyjum eru sjómenn upp til hópa á móti fyrningarleið. Við viljum 100% veiðiskyldu, kvóta úthlutað eftir veiðireynslu undanfarinna þriggja ára, það sem menn ekki veiddu verði sett í útboð eða úthlutað til þeirra sem veiddu allna sinn kvóta á viðmiðunartímabilinu. Ákveðinn sveigjanleiki verði fyrir hendi, t.d. ef skip bilar eða er í breytingum o.s.frv. Svo mætti auðvitað skipta á veiðiheimildum án þess að greiðsla komi fyrir. Þetta var samþykkt á formannafundi SSÍ sl. haust sem var haldinn hér í Eyjum. 

Ef þessi leið hefði verið farin á sínum tíma þá værum við ekki í þessum deilum núna. Svo má segja um skötuselinn að það kerfi virðist hannað fyrir suma en ekki aðra, aðallega suma.

Komin heim frá Egyptalandi.

Moren.

Jæja öll frí taka enda og við erum komin heim frá Egyptalandi. Egyptar eru gott fólk og vandað en reyna stundum að plata þig í viðskiptum. Þá gildir að vera harður á sínu og sína enga linkind og þá verða þeir ánægðir. Prútt er eiginlega þeirra þjóðaríþrótt. Svo auðvitað fótboltinn. Við vorum niðri í bæ þegar þeir urðu Afríkumeistarar og þvílík læti, mörg þúsund manns þustu út á götur og börðu bumbur, þeyttu lúðra og sungu langt fram á nótt og gleðin var engu lík. Þrátt fyrir að Egyptar drekki ekki áfengi var gleðin fölskvalaus og stoltið leyndi sér ekki í andlitum þeirra. Einn söngurinn sem þeir sungu var á þá leið að næst væri það heimsmeistaratitillinn. Og má kannski til sanns vegar færa því liðið þeirra er frábært knattspyrnulið og unun á að horfa, þeir spila einhvern veginn með hjartanu og trúa að hinn mikli Allah færi þeim gæfu og gengi umfram allt annað.

Annars var þetta frábær ferð alltaf 25-28 stiga hiti og sól nema tvo daga sem var skýjað. Tveimur dögum áður en við komum rigndi í fimm tíma og þá hafði ekki rignt í 13 ár í Sharm el Sheik og allt fór á flot því engin eru niðurföllin til að taka við öllu þessu vatni. Tekur því ekki að gera holræsakerfi fyrir úrkomu sem kemur á 15-20 ára fresti, sögðu arabarnir, alltaf jafn pollrólegir.

Fátæktin er mikil í Egyptalandi þótt við yrðum ekki vör við hana vernduð á túristastað en fórum þó í heimsókn í bæ þar sem búa einungis arabar og þar sá maður eymdina, betlarar og tötrum klætt fólk sem var skinhorað og börn sem börðust um hvern matarbita sem að þeim var réttur. Þó sögðu starfsmenn hótelsins sem við vorum á að þetta væri að breytast til batnaðar hægt og rólega með aukningu ferðamanna, enda er uppbygging mikil á því svæði sem við vorum á.

Egyptaland er fr'abaert

Moren

Er 'i Sharm el Sheik 'i Egyptalandi ad sleikja s'olina. Her er 25 stiga hiti og alltaf heidskyrt. Ekki er mikil utgerd ad sj'a en fiskurinn er godur og margar framandi tegundir. Eydimorkin er allstadar um kring og vid aetlum upp i fjollin i naestu viku og skodum ta m.a. Sinai fjallid tar sem Mose gamli tok vid bodordunum 10 fordum daga. Erum 'a hoteli i Naama Bay med utsyni yfir floann. Arabarnir eru mjog gestrisid folk og gera allt fyrir okkur. Haukur er nykominn ur nuddi og er eins og nysleginn tuskildingur med gati. Naeturlifid eigum vid eftir ad skoda en baerinn er stor og nogu ur ad moda. verdlagid er hagstaett, en vinid er dyrt en vid erum med allt innifalid svo ad vid sleppum vel.

Kjanagangur ad taka ekki tolvuna med, allstadar fritt tradlaust net en verd ad lata hoteltolvuna duga. Afram Island i handboltanum og vid vinnum Danina.

Kvedja fra Egypt Valli, Haukur Bogga og Eyglo

Tvímennt við allar bryggjur í Verstöðinni.

Moren.

Það er gaman að vera á bryggjunum í Eyjum núna. Mörg skip í landi og þar á meðal nokkur stór. Þar á meðal 11 stór uppsjávarskip. Flestir þeirra eru að bíða eftir veðri til gulldepluveiða. Höfnin er eiginlega troðfull af skipum og nokkrir þurfa að tvímenna.

Þorsteinn landaði í morgun 75 tonnum af blönduðum afla og Vídalín var með góðan karfaafla. Verðið á karfanum í Þýskalandi er um 1,5 evra/kg sem er ágætt en væri eflaust hærra ef ekki væri allt á kafi í snjó í Evrópu og illa gengur að koma fiskinum til kaupenda. Dala Rafn var með 20 tonn og svo kemur skriðan á morgun í föstudagsskipið. Guðmundur er að landa 850 tonnum af frosnum kolmunna og fer annan túr.

Ekki fannst næg loðna til að gefa út kvóta en samt virðist ástandið vera betra en undanfarin ár og vonandi finnst hún þegar veiðiskipin fara í alvöruleit. Togskipin hafa orðið vör við loðnu víða og bendir það til betra ástands en oft áður. Væri nú ekki þjóðráð að gefa út meiri síldarkvóta, það er nánast hægt að ganga þurrum fótum á síldinni í Breiðafirðinum.

 

Verstöðin 12 jan 2010

Daginn.

Huginn er að landa 1000 tonnum af síld úr Breiðafirðinum í Gúanóinu, fengu það í einu kasti strákarnir. Þeir voru fljótir að klára þetta úthald Huginsmenn, bara eitt kast!! Svo þarf náttúrulega að slútta vertíðinni en þeir verða nú ekki í vandræðum með það enda vanir menn í skemmtanabransanum.

Væri nú ekki ráð að gefa út meiri síldarkvóta og skapa verðmæti handa þurfandi þjóð?

Ekki góðar fréttir af Gæslunni. Að líkindum verða einungis tvær þyrlur eftir marsmánuð og það veit ekki á gott. Eins og kunnugt er þarf tvær þyrlur í björgunarflug ef farið er 30 mílur frá strönd. Enginn setur útá það enda öryggisatriði. EN ef önnur þyrlan er biluð eða í skoðun er ástandið vægast sagt slæmt fyrir sjómenn þessa lands. Gæslumenn hafa sagt að þeir geti ekki tryggt að þyrlubjörgun allt árið með tveimur þyrlum. Stjórnvöld verða að gera sér grein fyrir hættunni sem skapast ef svona fer. Það verður þungt högg ef það vantar þyrlu ef eitthvað ber útaf utan við 30 mílurnar. Niðurskurður á fjárveitingum til Gæslunnar er svakalegur og ekki er hægt að ætlast til að þeir hagræði meira ef þeir eiga að halda uppi lögbundinni starfsemi. 

Eigum við að leigja frá okkur nýja varðskipið til hagræðingar?

Því hefur verið haldið fram að það sé einungis tímaspursmál hvenær óhapp verður á stóru flutningaskipi við Íslandsstrendur. Ef svo fer verður að vera stórt skip til aðstoðar. Kannski er hægt að gera áætlun með útgerðum stærstu fiskiskipanna að þau komi til hjálpar. Þau eru mörg hver mjög öflug og gætu hentað í svona aðstoð. Svo er auðvitað spurningin hvort þau séu tiltæk á þeim tíma sem þeirra er óskað.

Þetta  er óskemmtileg staða sem Gæslan er í og sjómannasamtökin verða að standa við bakið á þeim og hamra á stjórnvöldum um að endurskoða afstöðu sína til fjárveitinga til Gæslunnar.

Þó svo að við séum ekki alltaf ánægðir að sjá Grámann þá eru þeir okkar langmikilvægasta öryggistæki og hafa í ófá skipti skilið milli feigs og ófeigs.

 

Blessuð blíðan ber að neðan í Verstöðinni

Moren.

Snjórinn farinn og bara blíða. Þrettándahelgin líka búin og nú taka þorrablótin við með hlöðnum borðum af súrmeti og hákarli. Norðlendingar og Kiwanis menn leggja á vaðið um næstu helgi. Alltaf eitthvað að gerast í skemmtanamálunum í Verstöðinni.

Annars eru allir á sjó og ekki mikið að frétta. Lítið finnst af kreppukóði og ekki má veiða síldina þó nóg sé af henni, ja svei þeim sem ráða, bjargráðin í kálgarðinum en ekki sjá menn skóginn fyrir trjám. Ufsaveiðin hefur verið mjög góð þrátt fyrir hrakspár Hafró og nú væri lag fyrir þá að leiðrétta ráðgjöfina í ufsanum.

Hjólin snúast í Verstöðinni

Góðan daginn.

Allt á fullu á bryggjunum. Allur Rauði herinn landaði í morgun, ætla að hræða krakkana sína í kvöld á tröllunum. Afli var misjafn, Smáey með 45 tonn, Bergey 25 tonn, Vestmannaey með fullt skip held ég um 60 tonn. Þorsteinn landaði í gær fullfermi af ufsa, snasaði flesta í ufsanum. Dala Rafn og Bylgja lönduðu líka. Suðurey með rúm 40 tonn. Vídalín og Gullberg í landi líka.

Flestir gera sér dagamun í kvöld og fara á sjó á morgun. Það er víst grímuball í kvöld í Höllinni og heyrst hefur að Biggi Sverris verði Lord Nelson.

Ráðherra vor, Hólabiskup gaf út síldarkvóta í gær í einhverju bjartsýniskasti, uppá heil 7000 tonn. Betur má ef duga skal herra biskup.

Gaman að sjá að aflaverðmæti skipa Ísfélagsins á síðasta ári var nálægt 5 milljörðum, þrátt fyrir að Snorri Sturluson sé farinn. En aftur hnýtur maður um þá staðreynd að meðalverð hjá Álsey miðað við sambærileg skip er nokkru lægra, eða um 4-5 kr/kg

Lætur nærri að miðað við kílóverð sé hásetahlutur á Álsey um 1,4 milljónum lægri en hjá öðrum.

Nýjasti mánudagur ársins í Verstöðinni.

Mánudagur 4 jan 2010
Nýtt ár er gengið í garð með væntingum um gott gengi til lands og sjávar.

En héðan er það að frétta að flestir eru farnir á sjó og færeyski ofurdallurinn Finnur Fríði landaði í FESið í gær 3500 tonnum af kolmunna sem fengust í færeyskri lögsögu. Þangað er Guðmundur farinn að reyna fyrir sér og á að frysta held ég.

Depludúddarnir eru farnir til leitar nokkrir, en engar fréttir ennþá. Sama er af öðrum að segja en reyni að snapa eitthvað markvert á morgun.

NA vinnukaldi þessa stundina en engar aftökur.