Síldarverð í Vestmannaeyjum

Moren.

Langt síðan síðast var bloggað. En Jötunn er á Facebook undir Sjómannafélagið Jötunn, opin síða.

Tilefni þessar færslu er síldarverð til sjómanna í Eyjum. Enn einu sinni greiða fyrirtækin í Eyjum lægsta verð til sjómanna fyrir síldina. Munurinn er 16-19%. Ekki er við þetta unandi lengur.

Þetta gengur þannig fyrir sig að þeir sem gera út á síld senda inn verð til Verðlagsstofu vikulega. Ef áhöfn og útgerð eru með gildan samning þá getur Verðlagsstofa ekki gert neitt í málunum. Svo er tekist á um þessi mál í Úrskurðarnefnd. Verðin sem slík eru trúnaðarmál. En auðvitað fær maður upplýsingar hjá sjómönnum um verðin og getur þannig borið saman.

Samkvæmt kjarasamningi og lögum um Verðlagsstofu skiptaverðs eiga áhafnir skipa og útgerðin að semja um verð sín á milli. Í flestum tilfellum er þetta þannig að áhöfnum er tilkynnt um verðið sem á að greiða. Það er EKKI kallað að semja.

Sum fyrirtæki eru með afurðaverðstengdan samning um verð. En það er nú bara þannig að þrátt fyrir það ná þeir alltaf að vera á botninum með verð til sjómanna. Annaðhvort er hlutfallið sem sjómenn fá af afurðaverðinu of lágt eða fyrirtækin með lélega sölumenn.

Það verður að breyta þessu verðmyndunarkerfi. Þetta gengur ekki lengur svona. Návígið sem sjómenn eru settir í er allt of mikið.  

 

Athugasemdir

[Sigmar Þór Sveinbjörnsson, 20.11.2013 kl. 15:36]

Alltaf sama sagan Valmundur, vantar ekki meiri samstöðu hjásjómönnum eins og svo oft áður ?

Kær kveðja Sigmar Þór

[Valmundur Valmundsson, 21.11.2013 kl. 13:45]

Sæll Simmi

Sjómenn eru í vondri aðstöðu. Það er farið með þessa hluti eins og mannsmorð. Allt í einhverju leynimakki. Þeim er stillt upp að vegg í mörgum tilvikum. Ef þú ert ekki ánægður skaltu finna þér annað pláss. Ekki algilt en þetta heyrist. Ég vil að þessi kaleikur og nálægð verði tekinn frá sjómönnum og fundin verði viðunandi lausn á verðlagsmálunum.

Svona í framhjá hlaupi er ég að lesa gamlar fundargerðir Jötuns og þar er víða minnst á fiskverðið eins og þú líklega manst eftir Simmi.