Verstöðin 26 jan 2012.

Moren.

Langt frá síðustu færslu. Tengdamóðir mín, blessunin hún Gunna Dóra lést 15 jan. Hef síðan þá verið í Reykjavík og haft nóg að gera við eftirmála þess. Blessuð sé minning hennar.

Sviplegt slys á Noregshafi í gær. Einn maður bjargaðist. Hann var í björgunarflotgalla. Enn einu sinni sanna þeir gildi sitt. Heyrði í morgun hjá Guðna Ölverssyni í Osló, að  ekki væri björgunargalla skylda á norskum skipum. Ef það er rétt þá vonandi setja þeir hana á eftir þetta hörmulega slys. Aðstandendur eiga um sárt að binda. Allir sjómenn hugsa til þeirra á sorgarstundu.

En að Verstöðinni. Ekki hefur borist mikið af loðnu hingað til Eyja. Þokkaleg veiði er víst núna í trollið en tregara í nótina. Dala-Rafn landaði í morgun 65 tonnum, mest ýsu. Einnig Smáey með eitthvað svipað. Vídalín er að landa karfa og ufsa. Suðurey landaði í gær rúmum 80 tonnum mest ýsu.

Sjómenn í Eyjum fá viðurkenningu.

Moren.

Í dag varð sá ánægjulegi atburður að sjómenn í Vestmannaeyjum fengu viðurkenningu fyrir störf sín.

Það var fréttamiðillinn Eyjafréttir sem sæmdu sjómenn í Vestmannaeyjum Fréttapýramídanum fyrir framlag til bættrar stöðu Vestmannaeyja.

Í texta á viðurkenningarskjalinu segir eftirfarandi:

,,Vestmanneyski sjómaðurinn, Sjómannafélagið Jötunn. Árið 2011 var eitt besta ár í sögu sjávarútvegs í Vestmannaeyjum. Undirstaðan er starf sjómannsins sem kemur með aflann að landi."

Margir fleiri fengu viðurkenningu Eyjafrétta og var Sigmund Johannsson maður ársins að mati Eyjafrétta. Sigmund er vel að sæmdarheitinu kominn. Sjómenn eiga honum margt að þakka, m.a. neyðarstoppið á netaspilin og Sigmunds gálgann. Einnig var sá gamli samviska þjóðarinnar í marga áratugi í Mogganum. Sjá nánar á www.eyjafrettir.is

Sjómenn í Vestmannaeyjum þakka Eyjafréttum kærlega fyrir viðurkenninguna.

Brælurnar ríða ekki við einteyming núna. Kolbrjálað veður til sjávar og sveita. Bergey fékk í skrúfuna í gær og Vestmannaey dró hana við illan leik á Eskifjörð. Suðurey og Vídalín lönduðu í gær um 50 tonnum hvor. Kap var í fyrradag með 1200 tonn af loðnu sem fór í bræðslu og Sighvatur í gær með 1400 tonn. Nú liggur flotinn í vari fyrir austan og bíður gæfta.

Ágætis byrjun...

Moren.

Ágætis byrjun á árinu, engin bræla og loðnan fundin. Byrjað að skarka í loðnunni með flottrollinu, hvort sem það er nú gæfulegt eða ekki. Ekki allir farnir á sjó en Þórunn landaði í morgun 50 tonnum af karfa. Svo verða einhverjir á morgun. Vestmannaey er í vélarskveringu og fer út um helgina. Krissan er með bilað stýri og fer upp í dag til viðgerðar. Svo á Skandía að fara upp á eftir Krissunni. Vídalín fór á sjó í gærkvöld. Drangavík fer í dag, rólegir í tíðinni strákarnir á Drangavíkinni alltaf.

Frár, Dala-Rafn og Bergur taka þrettándann áður en þeir fara á sjó. (Fjölskylduvænir.) Glófaxi byrjar ekki fyrr en um miðjan febrúar. Portlandið fer þegar hættir að snjóa.

Margir farnir til loðnuveiða. Litla Kap og Ísleifur eiga að fara á loðnu. Skipstjóri á litlu Kap verður túnfiskveiðarinn Sveinn Rúnar Valgeirsson. Með Ísleif verður Jón Atli Gunnarsson. Veit ekki með flaggskipið Sigurð og Sigurjón Ingvars. Huginn tekur þrettándann heima til að eyða flugeldabirgðunum frá áramótunum. Annars eru allir farnir.

Verstöðin 30 des 2011

Moren.

Jæja Gleðileg jól þó seint sé. Var í borginni um jólin og í bloggfríi. Nú er maður mættur á svæðið og heima er best.

Nokkrir fóru á sjó milli hátíða. Vídalín, Bergey, Þórunn, Drangavík og Smáey. Lönduðu allir í morgun. Svona slarkfært fiskirí. Þórunn var með 45 tonn mest karfi. Hinir með 20-30 tonn hver. Nú er helvítis bræla og gámadallurinn kemst ekki inn fyrr en lægir.

Félagsfundur Jötuns verður kl 17:00 í dag í Allanum og allir sjómenn fjölmenna. Svo verður létt lúkars- spjall á eftir með einhverju til að væta kverkarnar.

Sjómenn og fjölskyldur. Óska ykkur farsældar og gjöfuls nýs árs á sjónum sem og annarsstaðar.

Verstöðin 15 des 2011

Moren.

Nú eru nokkrir að landa. Dala-Rafn er með 40 tonn, Frár með 35 tonn, Þórunn með 80 tonn, Vídalín landaði í gær 100 tonnum. Rauði herinn er á morgun. Dala-Rafn og Frár eru hættir fyrir jól. Vídalín er að fara út og Þórunn verður að fram að jólum og milli hátíða. Gullgámurinn freistar enn. Guðmundur er kominn úr austurvíking og er að landa 830 tonnum af norsk-íslenskri síld. Huginn er búinn með sinn skammt af íslandssíld og er kominn með jólaljósin. Skúrað og skrúbbað fyrir jólin og skipin skreytt.

Ein gömul siglingasaga að norðan.

Á einum Akureyrar síðutogaranum voru menn að fiska í siglingu. Stýrimaðurinn var mjög stressaður þegar hann fékk að leysa kallinn af á toginu. Alltaf galandi í bátsmanninn að þreifa á vírunum og athuga hvort það væri nú ekki í botni. Bátsmaðurinn var ekki par hrifinn af þessum þreifingum en lét það ekki í ljós en sagðist borga stýrimanni þetta við tækifæri. Líður nú túrinn og siglt á England. Þar náði stýrimaður sér í konu eina góða og mætti með hana um borð. Hurfu þau svo í klefa stýrimanns. Nú er lag segir bátsmaður. Tekur með sér mannskapinn og þeir læðast að klefa stýrimanns. Bátsmaður opnar rifu á klefahurðina og þar blasir afturendi stýrimanns við þeim á fullri ferð. Bátsmaður stekkur til og rífur í punginn á stýrimanni og galar; ,, ER ÞAÐ Í BOTNI."!!

Tekið skal fram að stýrimaður var ógiftur maður á þessum tíma.

Mokið meiri snjó.....

Moren.

Jæja nú líður manni eins og á Sigló í denn. Moka bílinn upp í morgun og moka sig inn á skrifstofu. Þæfingsfærð í bænum en ekki eins mikill snjór eins og í Grindavík sem sumir kalla Flórídaskagann....

Nokkrir voru að landa í morgun. Frár með 35 tonn úr Breiðó. Suðurey með 40 tonn. Þórunn, Dala-Rafn og Bergey lönduðu líka. Veit ekki hvað þeir voru með en ekki voru þeir fullir!! Verðin á markaðnum eru mjög góð núna. Skötuselurinn hefur farið á 1000 kall og ufsinn uppí 270 kr. Eins úti í Englandi, sallafín verð og allir ánægðir. Ekki eins ánægður með ufsaverðið í beinum viðskiptum, það hangir í 140 kr. Verður að hækka ufsann í áttina að markaðsverðinu.

Tillögur Jóns bónda um fiskveiðistjórnunina hafa verið nokkuð til umræðu. Karlinn ætlast til að hann hafi 33.000 tonn til að úthluta sjálfur. Hvað þýðir það? Jú, pólitísk spilling heitir það. Svo eru í frumvarpsdrögunum 30 heimildir til ráðherra til að setja reglugerðir um allt og ekki neitt. Ef viðbót kemur á kvótann eiga trillukarlar og ráðherra að fá 50% af aukningunni. Ekki þeir sem þreitt hafa þorrann í niðurskurðinum. Allskonar pottar eru í drögunum og maður óttast að þeir pottar fari að leka með  tímanum og sumir selji sig út í fjórða eða fimmta skipti, komi svo aftur tvíefldir og heimti heimildir enn einu sinni. Reynslan kennir okkur að svona verði þetta.

Sjómenn hafa lagt til að kerfin verði tvö. Pottur 1 og 2. Í potti eitt verði aflamarksskip með ákveðna fasta prósentu af útgefnum kvóta og krókaaflamarksbátarnir fái rest og hendur ráðherra verði vel bundnar svo ekki verði endalaust verið að hræra í kerfinu. Menn geti verið sæmilega rólegir um að kvótinn verði ekki hirtur af þeim ef ráðherra fer öfugu megin framúr einhvern morguninn. Ef um aukningu verður að ræða fái kerfin aukninguna eftir prósentustærð þeirra. Eins ef heimildir dragast saman. Engar rósir og flækjur.

Nú er búið að taka völdin af bónda vorum og afhenda þau öðrum. Held að flækjustigið aukist bara við það. Nærtækasta leiðin er að fara samningaleiðina eins og stóra nefndin lagði nánast öll til.

Verstöðin föstudagur 2 des.

Moren.

Jæja nokkrir að landa í morgun. Vestmannaey og Smáey með sitthvor 50 tonnin. Bergur með eitthvað svipað. Frár með 42 tonn í gær og Bergey með 50 tonn. Þórunn var líka í gær með 100 tonn. Drangavík er hætt á krabbanum og fer á fiskitroll. Brynjólfur og Krissan eru komnir á net. Glófaxi er á skötuselsnetum með smá ufsaívafi. Goggi yfirtrillukall var með 2 tonn af ýsu á 8 bala í morgun. Seigur kallinn.

Félagsfundur Jötuns verður 29 eða 30 des í Alþýðuhúsinu. Um nóg er að spjalla og ég vona að sem flestir mæti. Svo verður eitthvað í hárið á eftir.

Verstöðin 29 nóv 2011.

Moren.

Nú andar köldu í Verstöðinni. Norðan kaldi með frosti. Gullberg var í gær með 80 tonn. Suðurey er að landa 75 tonnum. Síldin er búin en Huginn er þó í Breiðafirðinum og bíður eftir veðri til að kasta. Á föstudag landaði Frár tæpum 20 tonnum af þorski sem þeir fengu í þremur hölum á Péturseynni. Einnig var Portland með 20 tonn af þorski af sama stað í voðina, mest í einu kasti. Svakalegir drjólar með vel þroskuð hrogn í sér.

Nokkur umræða hefur verið undanfarið um verðlagningu á sjávarfangi. Fréttir berast af því að vinnslan taki hluta af arðinum af auðlindinni gegnum sölufyrirtæki erlendis. Fyrirtæki sem þeir í raun eigi sjálfir. Þeir fjármunir komi því aldrei inn í hagkerfið, heldur verði eftir erlendis. Þess vegna er því haldið fram að fiskverð til sjómana sé of lágt miðað við nágrannaþjóðir okkar. Mikið er til í því og þær tölur sem við höfum séð, benda til að fiskverð t.d. í Noregi sé allt að 50% hærra en hér á landi.

Í Noregi eru veiðar og vinnsla aðskildar og í raun er allt selt á uppboði. Þar er sett lágmarksverð sem byggir á afurðaverði. Þetta á við um uppsjávarfiskinn. En meiri upplýsingar vantar um verðlagninguna til þess að hægt sé að alhæfa um þessi mál.

Ég þekki til á norskum frystitogara sem fiskar í Barentshafinu og víðar. Þar eru hásetar með ákveðna prósentu af afurðaverði. Ekki hlutaskiptakerfi eins og hjá okkur. Einnig eru færri í áhöfn en á Íslandi. Miðað við launin á þessum togara erum við á eftir. En allur samanburður er erfiður vegna gengis krónunnar, færri í áhöfn og ekki alltaf hlutaskiptakerfi.

Launahlutfall útgerða í Noregi er samt lægra en hjá okkur. Þetta þarf að greina betur áður en við fullyrðum eitthvað sem við getum ekki staðið á. En aðalatriðið er að útgerðin hér á landi leggi spilin á borðið um sölumálin og hafa raunar boðist til þess og því ber að fagna.

Fisk á minn disk, á réttu verði.

Moren.

Drangavík var að koma inn. Bergey og Vestmannaey lönduðu í fyrradag eitthvað um 30 tonnum hvor. Vídalín landaði í Höfuðborginni í gær og er með bilað spil. Annars er lítið að frétta. Huginn er kominn úr austurvíking og fer í Breiðafjörðinn á sunnudag. Líklega verður hann lengri tíma en í fyrra að klára íslandssíldina en þá þurfti hann eitt kast og vélstjórinn svaf af sér heila síldarvertíð. Þórunn og Dala-Rafn verða á morgun og Bergur líklega líka.

Nokkuð hefur verið rætt um verðmyndun á uppsjávarfiski undanfarið. Ekkert er fast í hendi þegar kemur að verðlagningu á uppsjávarfiski uppúr sjó. Kallarnir eiga að semja sjálfir við útgerðina í flestum tilfellum. Hér í Eyjum er annað af stóru fyrirtækjunum með afurðaverðstengingu sem er nokk betra en að slást um verðið í miklu návígi. En ég minni á að ef ekki semst um verð er það réttur bæði kallanna og útgerðar að vísa málinu til úrskurðarnefndar. Það gengur ekki að verð sé ákveðið einhliða og ef menn eru ekki ánægðir geti þeir farið eitthvað annað.

Útgerðarmenn hafa undanfarið farið mikinn í auglýsingum um kvótakerfið og atvinnusjómenn hafa stutt við bakið á þeim í þessum málum. Við vitum ekki hvað við fáum í staðinn fyrir núverandi kerfi en víða eru agnúar í núverandi kerfi sem sníða má af.

Engin trygging er fyrir því að t.d. Vestmannaeyjar haldi sinni hlutdeild í aflamarkinu ef tillögur Jóns bónda verða ofaná. Það þýðir að hjá okkur er búið til vandamál til að leysa vandamál annarsstaðar. Vandamál sem menn bjuggu til sjálfir með því að klúðra sínum málum og vilja nú byrja aftur. Þessu höfum við mótmælt og staðið með útgerðinni. Þannig að útgerðin hlýtur að standa með okkur í verðlagningunni.

Um frumvarp ráðherra þarf ekki að hafa mörg orð. Nánast allir sem gáfu umsögn um frumvarpið gáfu því falleinkunn. Meira að segja handvaldir sérfræðingar ráðherra rústuðu því. Nú liggja margir undir feldi við að semja nýtt frumvarp, þannig að við fáum líklega fimm frumvörp um fiskveiðistjórnunina á vordögum. Gaman ekki satt??

Eyjamenn í fjötrum Vegagerðar.

Moren.

Gullberg er að landa sínum skammti um 80 tonnum held ég. Sighvatur er að bíða eftir að Kap klári að landa. Júppi er á leiðinni með 800 tonn og á einn túr eftir. Álsey farin á loðnu. Þorsteinn landaði 1750 tonnum af loðnu á Þórshöfn um helgina. Sigurður kastar og kastar en lítið fæst í nótina ennþá.

Jæja. Ef við hjónin ætlum uppá land á okkar fjölskyldubíl og til baka, verðum við að reiða fram kr. 11.016- að lágmarki ef siglt er á Þorlákshöfn. Þá er ekki tekinn klefi og við erum með afsláttarkort.

Ef við hefðum þjóðveg á milli og við myndum keyra þessa 50 km. þá væri bensínkostnaðurinn á mínum bíl kr. 2500 og við bætum 1000 kali við í viðhald bílsins. Semsagt 3500 kall að keyra þessa leið fram og til baka ef einhver væri vegurinn. Nú er Herjólfur okkar þjóðvegur þannig að við ætlumst til þess að greiða raunverð fyrir þennan spotta en ekki tæplega þrefalt eins og við gerum núna.

Vegagerðin ræður verðlagningunni á þessum ,,þjóðvegi" og enginn virðist geta lagt neitt til málanna um sanngjarnt gjald fyrir þennan spotta. Alvaldurinn segir að svona sé þetta og svona verði þetta. Ef einhver olíufursti prumpar eða Bónus hækkar matvöruna þá kemur Vegagerðin og hækkar í Herjólf.

Ég er alveg tilbúinn að greiða 3500 kall fram og til baka fyrir bílinn. Það á að nægja Vegagerðinni. Skítt og laggó hvernig menn reikna sig á hausinn fram og aftur. Við eigum heimtingu á því að sitja við sama borð og aðrir landsmenn. Frítt fyrir fólkið nema kojurnar. Aðvitað greiðum við fyrir þær ef við viljum leggja okkur á leiðinni.

Í raun gildir það sama um Landeyjahöfn ef við miðum við hve langt er þangað og jafnvel má halda því fram að með sömu forsendum sé dýrara að ,,keyra" þangað.