Nýjustu fréttir af sjómannaafslætti

Í greinargerð fjármálaráðuneytis með hinu nýja frumvarpi um sjómannaafsláttinn, segir:

,,Sjómannaafsláttur hefur lengi verið umdeildur og gagnrýni á hann hefur aukist á undanförnum árum af ýmsum ástæðum''.

Ég mótmæli þessu harðlega og held því reyndar fram að þessi ,,gagnrýni'' komi úr einni átt og frá mjög fámennum hópi. Þessi hópur heldur til í 101 hverfinu í Reykjavík og þar í kring. Þetta er yfirleitt menntafólk, prófessorar, fólk með doktorsnafnbætur og frjálshyggjupostular af vettvangi stjórnmálanna.

Hvað sjómenn hafa gert þessu fólki er mér óskiljanlegt. Ef þú býrð úti á landi þá heyrir þú ekki þessa gagnrýni. Þar veit fólk að sjómennirnir eru þeir sem vinna hættulegasta starfið og eru langdvölum að heiman við að afla fjölskyldunni og þjóðfélaginu tekna. Bara það að vera langdvölum fjarri fjölskyldu og vinum, réttlætir afslátt á skatti sjómanna. Almannaþjónusta við sjómenn er snöggtum minni en við aðra þjóðfélagsþegna og eru þetta næg rök að mínu mati fyrir afslættinum.

Öll umræða um að sjómenn ættu bara að finna sér aðra vinnu ef þeir eru ósáttir með afnám afsláttarins, er húmbúkk og lýsir best rökleysu og vanþekkingu þeirra sem frá segja.

Í nágrannalöndum okkar er starf sjómannsins metið að verðleikum. Í Noregi var sjámannaafsláttur hækkaður með fjárlagafrumvarpi fyrir árið 2010. Hann er nú 150.000 nkr. Þ.e. sjómenn í Noregi borga ekki skatt af fyrstu 150.000 nkr. sem eru 3,2 milljónir íslenskra króna.

Í Danmörku er afslátturinn 190 dkr (4560 íkr) fyrir hvern dag og að hámarki 41.800 dkr á ári.(1.1 milljón ís kr)

Færeyskir fiskimenn mega hafa 75.000 dkr (1.8 millj. ískr) skattfrjálsar.

Svíar láta sínum fiskimönnum í té 640.000 ís.kr á ári í skattafslátt.

Af þessari upptalningu sést að íslenskir sjómenn eru langt á eftir nágrönnum okkar í þessum málum og hafi stjórnvöld skömm fyrir. Allt tal um að þetta samrýmist ekki stjórnarskránni og reglum EES er kjaftæði þeirra sem sjá íslenska sjómenn sem einhverja forréttindastétt.

Hvað með dagpeninga, staðaruppbót, bifreiðastyrk, ferðakostnað og fleira sem sumir fá ofaná laun sín og allt skattfrjálst. Eigum við ekki að byrja á því, þar er kostnaðurinn líklega 23 milljarðar árið 2008 bara hjá ríkinu.

Athugasemdir

[Helgi Þór Gunnarsson, 6.12.2009 kl. 00:39]

Sæll Valmundur, þessi grein hjá þér er sú besta sem ég hef séð á prenti, núna upp á síðkastið, það þurfa fleiri að sjá hana, því tek ég mér það bessaleyfi að setja hana inn á andlitsbókina, ég þarf ekki að taka það fram að ég er þér sammála.

Kær kveðja.

[Valmundur Valmundsson, 6.12.2009 kl. 09:57]

Sæll Helgi.

Gott mál að þetta fari vem víðast. Ætla að skrifa aðeins í næstu Fréttir.

Smá villa síðast í greininni. Þessir 23 milljarðar eru heildargreiðslur sem eru skattfrjálsar 2008 samkvæmt vef RSK bæði hjá Ríki og einkaaðilum

[Sigmar Þór Sveinbjörnsson, 6.12.2009 kl. 23:28]

Heill og sæll Valmundur, ég tek undir með Helga Þór, Þetta er frábær pistill hjá þér og þarf að fara víðar. Það vantar einmitt svona greinar til að svara þessu fólki sem er að berjast gegn sjómannaafslættinum og sjómönnum. Sjómenn eru alltof linir við að berjast fyrir sínum málum. Það er t.d. með ólíkindum að sjómenn skuli ekki mótmála því harðlega að SjÓMANNADAGURINN skuli hafa verið gefið nafnið Hátíð hafsins.

Kær kveðja