Loksins er bloggað!!

Moren.

Jæja nú er maður kominn aftur á klakann. Tenerife í 11 daga var ljúft og ekki var kuldanum fyrir að fara þar. Stuttbuxur allan tímann og frítt að drekka!!

En það er búið að vera mok á flotanum undanfarið. Menn skutlast út í einn og tvo daga og fylla. Þorskurinn er allstaðar og hvergi eins og maðurinn sagði. farið að saxast á kvótann og yfirleitt farinn einn túr í viku. Krissan er að fara á snurvoð og Brynjólfur á humar. Glófaxi er að fara í málun og svo á humar. Smáey farin til nýrra eigenda á Grenivík. Nokkrir sjómenn þar að leita að plássi.

Set hér inn umsögn Sjómannasambandsins um auðlindafrumvarpið arfavitlausa. Þar er gert ráð fyrir því að skatturinn á hvern haus í Eyjum verði rúmar 800.000 krónur. Er ekki komið nóg af skattpind þessarar ríkisstjórnar?

 

Umsögn um frumvarp til laga um veiðigjald.

Sjómannasamband Íslands hefur fram til þessa verið mótfallið veiðigjaldi í formi auðlindagjalds. Eðlilegt er að útgerðin greiði hóflegt veiðigjald til að standa straum að kostnaði við stofnanir ríkisins á sviði fiskveiðistjórnar og sjávarútvegs, en að öðru leyti eru engin rök fyrir sérstöku veiðagjaldi á útgerðina að mati Sjómannasambands Íslands.

Ástæða þess að Sjómannasamband Íslands er mótfallið auðlindagjaldi er sú einfalda staðreynd að á endanum verða það sjómenn en ekki útgerðirnar sem greiða stóran hluta gjaldsins. Má í því sambandi minna á tengsl útgerðar og fiskvinnslu og hvernig þau tengsl hafa haft óæskileg áhrif á verðmyndun  aflans. Vegna launakerfis sjómanna, þ.e. hlutaskiptakerfisins, ræður verðmæti aflans mestu um launakjör sjómanna. Útgerðarmenn munu leita allra leiða til að velta byrðinni af sérstaka veiðigjaldinu yfir á sjómenn með tilheyrandi tekjuskerðingu.

Sú nýbreytni er tekin upp í frumvarpinu að ákvarða umframhagnað eða auðlindarentuna út frá afkomu sjávarútvegsins í heild, þ.e. veiða og vinnslu sameiginlega, þó gjaldið sé síðan innheimt af útgerðinni. Í ljósi samtvinnunar veiða og vinnslu telur Sjómannasamband Íslands  þessa aðferðafræði rökrétta ef innheimta á veiðigjald út frá auðlindarentu á annað borð. Þetta ætti að koma í veg fyrir að arður sem myndast í atvinnustarfseminni verði fluttur frá veiðunum yfir í vinnsluna til að sleppa við að greiða gjaldið, þ.e. lágmarkar neikvæð áhrif á fiskverð sem notað er til hlutaskipta.

Deila má síðan um hve há reiknuð ávöxtun rekstrrarfjármuna  á að vera til að að finna eðlilega reiknaða rentu eða stofn til veiðigjaldsins og hve há álagningin á reiknaða rentu á síðan að vera.

Samkvæmt frumvarpinu er reiknuð ávöxtun rekstrarfjármuna, sem dregin er frá vergri hlutdeil fjármagns (EBITDA), 10% í fisvinnslunni og 8% í veiðunum þegar reiknuð renta er fundin. Reiknað er með að sérstakt veiðigjald verði síðan 70% af samanlagðri reiknaðri rentu í veiðum annars vegar og vinnslu hins vegar reiknað á hvert þorskígildiskíló að frádregnu almennu veiðigjaldi. Sjómannasamband Íslands telur reiknaða ávöxtun rekstrarfjármuna of lága og skattlagninguna á umframrentuna of háa til að útgerðin geti staðið undir veiðigjaldinu.

Varðandi fyrirhugaðar auknar álögur á útgerðina í formi veiðigjalds má minna á að Alþingi setti í lög haustið 2009 að sjómannaafsláttur yrði afnuminn í áföngum. Nú hefur sjómannaafslátturinn verið skertur um 50% af því sem hann var á árinu 2010 í krónum talið og verður hann að fullu fallinn brott árið 2014. Með lagasetningunni vísaði Alþingi samtökum sjómanna á útgerðina varðandi bætur vegna afnáms sjámannaafsláttarins. Með auknum álögum á útgerðina er samtökum sjómanna ekki auðveldað að sækja bætur til útgerðarinnar. Sjómannasamband Íslands skorar því á Alþingi að nota þetta sérstaka veiðigjald, verði það lagt á, til að draga skerðinguna á sjómannaafslættinum nú þegar til baka.