Sumarstemmari.

Moren.

Nú er sumarstemming í Vestmannaeyjum. Sól og 16 stiga hiti. Túristar allsstaðar og sæmilegt fiskirí hjá Eyjaflotanum. Þórunn kom inn með bilað spil í gær með 45 tonn mest ýsu. Norskir spsialistar komu og gerðu við spilið og Þórunn fór á sjó undir miðnótt.  Suðurey landaði 40 tonnum af makríl í gær. Gullberg kom í gærkvöld með góðan afla. Kap var í gær með á fjórða hundrað tonn af síldarblönduðum makríl. Svo er Sighvatur undir núna með 300 tonn. Júpiter kom frá Grindavík í gær. Búið að gera við vélina en þá bilaði kælikerfið. Komast á sjó á morgun líklega.

Makrílverðið er mjög furðulegt núna. frá 50 kallinum uppí 120 kall. Litlu sérhæfðu vinnslurnar greiða hærra verð sem er eðlilegt en þeir stóru eru að vinnaá mjög mismunandi verðum. Mismunurinn er allt of mikill og það verður að koma skikki á þessi verðmyndunarmál. Færa þennan bitra kaleik frá sjómönnunum til stéttarfélaga sjómanna og leyfa okkur að pönkast í þessum málum. Nú er það svo að útgerðarmenn og sjómenn eiga að semja sín á milli um verð á uppsjávarfiskinum. Staðreyndin er sú að yfirleitt kemur tilkynning frá útgerðinni um verð og ef sjómennirnir eru ekki sáttir geta þeir farið eitthvað annað. Tek fram að þetta er ekki svona hjá öllum útgerðum. Sumir útgerðarmenn hafa gert samninga við sína sjómenn um prósentu af afurðaverði, sem er til fyrirmyndar.

En heildarlausn verður að finna í þessum málum svo við getum hætt þessum hanaslag.

Athugasemdir

[Sjómaður (IP-tala skráð) 13.7.2011 kl. 14:26]

Þetta er ekki bara svona um uppsjávartegundirnar. Í öllum tegundum nema þorski, ýsu, karfa og ufsa eru þessi mismunandi verð í gangi.

Tökum sem dæmi:

Vísir í Grindavík kaupir löngu og keilu af sínum línuskipum á; langa 150 kr/kg og keila 100 kr/kg. Ekki er það glæsilegt verð og langt undir eðlilegu markaðsverði og verði í föstum viðskiptum. En þeir ráða verðinu sjálfir og ekkert við því að segja.

Rammi í Þorlákshöfn borgar 25-40% hærra verð (fer eftir stærðarflokkum) fyrir humar heldur en VSV. Nákvæmlega sami humarinn hjá þessum skipum. En þeir ráða verðinu sjálfir og ekkert við því að segja.

Rækjuvinnslur á Norðurlandi og víðar borga hörmungar rækjuverð til eigin skipa. Verð á rækju er það lélegt að mig minnir að það nái ekki 50% hækkun frá árinu 2003. Á sama tíma hefur þorskur hækkað um 120-130% og karfi um tæp 200%. Er þetta miðað við að landað sé til eigin vinnslu. En þeir ráða verðinu sjálfir og ekkert við því að segja.

Er ekki orðið tímabært að staldra aðeins við og skoða þessi verðmyndunarmál með einhverri alvöru. Ekki bara segja að þetta gangi ekki svona lengur. Það hefur verið sagt allt of lengi. Nú verða hlutirnir að gerast.

Annars hef ég lítið sem ekkert kynnt mér þennan nýja sjómannakjarasamning en vonast að sjálfsögðu til þess að verðmyndunarmálin séu þar inni. Eina leiðin til þess að koma þessum verðum á hreint er að setja þau undir verðlagsstofu í gegnum kjarasamninga.

Hækkuð kauptrygging. Nýsmíðargjald afnumið. Löndunarfrí hjá öllum skipum yfir 150 brl. ásamt fleiru eru sjálfsagðar kröfur og setja enga útgerðarmenn á hausinn.

Kveðja

[Valmundur Valmundsson, 13.7.2011 kl. 15:40]

Sæll Sjómaður.

Núverandi kerfi gerir ráð fyrir að sjómenn og útgerðarmenn geri með sér fiskverðssamninga. Þar er brotalöm á vegna þrýstings útgerðarmanna og skorts á samstöðu meðal sjómanna. Sjómenn þurfa að segja upp verðinu og þá kemur til kasta úrskurðarnefndar að úrskurða um verð. En viðkvæðið er alltaf að menn geti farið annað ef þeir eru ekki ánægðir með launin. Og hótun um að leggja skipunum. En í lögunum um verðlagsstofu skiptaverðs er ákæði um að ekki sé hægt að leggja skipum vegna deilu um fiskverð, þannig að sjómenn eiga ekki að hlusta á svoleiðis kjaftæði. Stéttarfélög sjómanna eiga að sjálfsögðu að semja um fiskverðið fyrir sína menn. Inni í kröfum okkar eru öll þau atriði sem þú telur upp. Bara það að sjómenn séu að landa fiskinum er hugsunarháttur sem ekki á að vera til lengur. Nýsmíðaákvæðið er úrelt fyrir löngu. Hefði ekki verið nær fyrir útgerðina að fjárfesta í nýsmíði heldur en í verðlausum pappírum á sínum tíma? Þeir völdu vitlaust og ætlast til að kallarnir borgi fyrir mistökin.