Bloggleti.

Moren.

Ekkert blogg undanfarið en bætum úr því hið snarasta. Fiskiríið hefur verið heldur dapurt undanfarið. Bergey, Vestmannaey, Frár, Bergur, Dala Rafn lönduðu í gær og voru með 30 til 40 tonn eftir vikuna. Smáey landaði í morgun og var með 40 tonn. Brynjólfur með 45 kör af humri og eitthvað af fiski. Líklega síðasti túr næst hjá honum á krabbanum. Herjólfur gengur í Landeyjahöfn og allt í góðu þar, enda einmunablíða svo elstu menn eru farnir að efast um að það sé kominn vetur.

Þing Sjómannasambandsins verður í næstu viku. Þar verður tekin ákvörðun um hvernig kröfur okkar á hendur útgerðinni lýta út fyrir komandi samninga. Samningar okkar losna um áramót. Nú er búið að ganga frá viðræðuáætlun við LÍÚ og menn byrjaðir að þreifa lauslega hvor á öðrum, alls velsæmis er þó gætt. Engar alvöru viðræður byrja fyrr en að loknu þingi okkar í næstu viku.

Að hálfu Jötuns er lögð mest áhersla á sjómannaafsláttinn, nýsmíða ákvæðið og verðmyndunarmálin, bæði í botnfiskinum og uppsjávarfiskinum. Mönnunarmálin eru einnig ofarlega á blaði. Einnig eru orlofsmálin undir og við gerum kröfu um að kjarasamningur okkar verði einfaldaður á mörgum sviðum.

Athugasemdir

[Sjómaður (IP-tala skráð) 27.11.2010 kl. 22:43]

En kauptryggingin?

Háseti .......................................................... kr. 197.845

Yfirvélstjóri ................................................... kr. 296.768

1. og 2. vélstjóri/vélavörður ......................... kr. 247.306

Netamaður ............................................... kr. 247.306

Bátsmaður .................................................. kr. 247.306

Enn þann dag í dag eru bátar gerðir út og ná ekki að fiska fyrir hlut suma mánuði. Það er staðreynd. Þetta eru kjörin sem þeir aðilar fá fyrir að vera 26 daga úti á sjó fyrir skatt.

Hásetatrygging á að vera lágmark 60 þúsund útborgað á viku.

Þið eigið greinilega ennþá langt í land. 

[Valmundur Valmundsson, 28.11.2010 kl. 16:58]

Satt er það að sumur eru á tryggingu og hún er alltof lág. Krafist verður hækkunar á henni eins og alltaf. Annars er tryggingin 204,500 frá 1. júní s.l.

[Sigmar Þór Sveinbjörnsson, 2.12.2010 kl. 00:07]

Heill og sæll Valmundur, takk fyrir fréttirnar. Fróðlegt að lesa það sem sjómaður skrifar hér að ofan um laun sjómanna ef þeir eru aðeins á tryggingu. þá er tímakaupið ekki mikið sérstaklega hjá háseta.

Kær kveðja