Bræla.

Moren.

Nú er suð-austan 25 á Höfðanum og ekkert ferðaveður til lands og sjávar. Var á ársfundi ASÍ fyrir helgi og tók þar þátt í fjörugu þingi. Villi Birgis frá Akranesi var við sitt heygarðshorn. Ef blessaður kallinn verður undir í einhverju máli verður hann alveg galinn og þá verður hann naut í flagi. Brigslaði Guðmundi Gunnarssyni um að kalla sig lýðskrumara. Ég heyrði ræðu Guðmundar og ekki gat ég heyrt að minnst væri á Villa í þeirri tölu. Guðmundur varaði við lýðskrumurum sem alltaf bjóða best hverfa svo á þegar standa á við stóru orðin. Lagði út af viðtali á RUV við Pál Skúlason, einn virtasta siðfræðing landsins. Villi tók þetta til sín og reyndar fleiri. Oft kannast menn við eigin bresti þegar minnst er á. Mikill meirihluti fundarmanna vildi ekki að almennu lífeyrissjóðirnir yrðu notaðir til að niðurgreiða skuldir annara.

Smá dæmi: Ef lífeyrissjóðirnir, þá þeir almennu, ekki ríkisstyrktu sjóðirnir enda eru þeir aldrei í umræðunni, tækju þátt í niðurgreiðslu skulda heimilanna, þyrfti að skerða beint þá sem nú fá greitt úr sjóðunum og væntanlega þá sem fá úr þeim næstu 15-20 árin. Segjum 10% skerðing.

Það þýðir að sá sem fær núna kr. 200.000 á mánuði úr sínum lífeyrissjóð fengi eftir skerðingu kr. 180.000. Það þýðir á mannamáli að á tíu árum fengi viðkomandi einstaklingur 2,4 milljónum minna en ella ef engin skerðing hefði komið til. Þetta er óásættanlegt, að skerða þá sem nú fá greitt úr sjóðunum og um alla framtíð til að greiða niður skuldir tiltölulegra fárra. Þeir sem nú fá greitt úr sjóðunum og hafa byggt upp sín réttindi um árabil, eru klárlega ekki þeir sem myndu njóta niðurgreiddra lána. Samt skal þeim gert að borga með skerðingu á sínum lífeyri. Svei og aftur svei.

Fréttir. Vídalín landaði í morgun 70 tonnum og Brynjólfur með 65 kör af humri. Drangavík með fullfermi, 70 tonn, mest karfa. Vestmannaey með 75 tonn, mest litla karfa sem fór í heilfrystingu hjá Goodthab. Svo komu Smáey og Bergey undir hádegi í löndun. Ekki náðist dælurörið góða af Perlunni upp í gær, enda komin of mikil hreyfing til að hægt væri að athafna sig með góðu móti. Gera á aðra tilraun á miðvikudag.

Athugasemdir

[Siggi H (IP-tala skráð) 25.10.2010 kl. 15:58]

Það ætti að leggja niður þessar glæpaklúbba sem að kallast lífeyrissjóðir. Borga þeim út sem að eiga réttindi og leggja þetta niður. Ef að fólk vill safna lífeyri þá ætti að opna fyrir að hver og einn geti ef að hann vill annaðhvort keypt tryggingu nú eða ríkisskuldabréf fyrir þessi % sem að umsamið er/ lögbundið.

Þá gæti hver og einn haft stjórn á sínum lífeyri. Það þarf ekki "feita ketti" í glerhúsum til að stjórna þessu. Má ég að lokum minna á að það voru "feitu kettirnir" sem að eru búnir að tapa stórfé úr sjóðunum, afhverju er ekki talað um það. 

p.s. "feitir kettir"= stjórnarmenn/stjórnendur lífeyrissjóða

[Valmundur Valmundsson, 26.10.2010 kl. 13:08]

Sæll Siggi H.

Það væru margir líklega rúnir inn að skinni núna, ef þeir hefðu fjárfest í bönkunum fyrir hrun er það ekki. Það gekk maður undir manns hönd að selja manni fjárfestingar í formi hlutabréfa á uppsprengdu verði og að bjóða manni lán í erlendum gjaldeyri. Og allt sprakk í andlitið á þjóðinni. Hverjir stóðu þá eftir? Það voru lífeyrissjóðirnir, vegna stífra reglna um fjárfestingar þeirra. Nú gengur maður undir manns hönd, ( pólitíkusar og aðrir lýðskrumarar ) og vilja fá það sem eftir er af aurum í landinu í gæluverkefni sín og til að bjarga örfáum á kostnað heildarinnar.