Saga af tveimur tóbaksköllum.

Moren.

Einu sinni voru Magni Jó og Helgi Ágústsson saman á Frigg Ve 41. Magni var skipstjóri og Helgi stýrimaður. Báðir tóku mikið í nefið, sátu oft saman í brúnni og buðu hvor öðrum í nefið með tilheyrandi soghljóðum og hreppstjórasnýtum. Eins og oft vill verða þá dreifðist tóbakið víða og var eiginlega salli yfir öllu í kringum stólana tvo í brúnni. Eitt sinn þegar við vorum búnir að vera fimm eða sex daga á sjó, þá voru Helgi og Magni orðnir tóbakslausir. Töldu það ekki mikið mál, bara þreyja þorrann fram að löndun næsta dag. Eins og þeir sjómenn sem brúka tóbak vita, þá geta síðustu klukkutímarnir í land verið helvíti lengi að líða ef allt er orðið tóbakslaust. Þannig var það með þá félaga. Þeir voru eins og ljón í búri og voru að spá í að fá sígarettur hjá okkur hinum til að tyggja eða troða jafnvel í nefið á sér. En við þvertókum fyrir að gefa þeim eina örðu af tóbaki vegna fyrri yfirlýsinga þeirra. Seint um kvöldið átti einn áhafnarmeðlimur leið uppí brú og kom þar að þeim félögum að sjúga úr stólunum í brúnni, það sem hafði farið til spillis hjá þeim í túrnum endaði samt í nefinu á þeim og við þurftum ekkert að ryksuga aldrei þessu vant. Tek líka fram að báðir ráku mikið við.

En annars er það að frétta að Dala Rafn landaði 63 tonnum af blönduðum afla, austan að. Drangavík með 70 tonn. Vestmannaey landaði seinni partinn í gær 65 tonnum.

Athugasemdir

[Árni Gunnarsson, 18.3.2010 kl. 14:17]

Magni var fengsæll skipstjóri og er vonandi enn. Hann hafði alltaf fyrir því að hitta mig að máli og spyrja um ástæður fyrir því þegar fiskurinn af Frigg féll í matinu. Hann var aldrei með skæting við mig en alltaf kurteis og einfaldlega áhugasamur um að fá leiðbeiningar um bætta meðferð aflans.

[Valmundur Valmundsson, 18.3.2010 kl. 14:32]

Sammála Árni. Það var gaman að vera með Magna, alltaf fjör þar sem hann er. Mikill áhugamaður um allt er lítur að veiðiskap.