Gott fiskirí og verðlag á fiski.

Daginn.

Jamm, Nokkrir að landa í morgun. Gullberg með 54 tonn. Drangavík landaði 67 tonnum, Smáey 55 tonn og Bergey með 65 tonn. Suðurey kom með 75 tonn.

Misræmið milli verðs á ufsa á fiskmörkuðunum og í viðskiptum milli skyldra aðila er orðið óásættanlegt og ekki í fyrsta skipti. Nú er meðalverð á mörkuðunum um 200 kall en vinnslurnar borga sínum sjómönnum milli 90 og 100 kall. sem sagt 100% munur sem er algerlega út úr korti. Sjómennirnir eru orðnir nokkuð langþreyttir á þessum grófa mismun og óréttlæti, alveg sama þó skýringin sé alltaf sú, að þeir megi veiða eins og þeir vilja.   Ég hvet útgerðir sem kaupa beint af sínum mönnum að markaðstengja ufsaverðið að lágmarki um 50% þá náum við einhverri sátt um málið.

Svo má líka nefna hvað bræðslurnar borga fyrir hratið í loðnunni, þar er misræmið of mikið, allt uppí 20-25% milli verksmiðja. Alltaf sama sagan, okkur vantar einhver tæki til leiðréttinga á þessu óréttlæti sem viðgengist hefur alltof lengi. Þetta vita sumir og hlæja uppí opið geðið á okkur.

Eða væri kannski best að aðskilja veiðar og vinnslu og bjóða allan fisk upp á markaði? Það virðist vera lag nú þegar umbylta á öllu fiskveiðistjórnarkerfinu.

Athugasemdir

[Fríða Einars (IP-tala skráð) 10.3.2010 kl. 15:51]

Var að skoða fiskmarkaðina og það er skömm af því hvað er flutt mikið út frá eyjum.Það er á milli 200 og 300 tonn í dag.

Auðvitað á að setja allan fisk á markað á Íslandi.Okkur vantar þennan fisk í okkar vinnslur.En höfum ekki séns á að bjóða í hann vegna þess að þeir setja svo hátt verð á hann.

Á fjölnetinu eru þeir að setja 549 kr á ýsuna í dag,svo að vinnslurnar hér geti ekki boðið í hann.Þetta er glæpamennska sem á að stoppa strax.

[Valmundur Valmundsson, 10.3.2010 kl. 16:41]

Sæl Fríða og takk fyrir innlitið.

Það er einhver misskilningur að verðið sé svona hátt á ýsunni. Núna er verðið úti um 320 kr/kg kostnaður við hvert kg er um 60 kall að þetta er um 260 kall heimalandað og ég er viss um að ef þú getur boðið það + karatryggingu þá færðu nóg af fiski. Allavega fá vinnslurnar hér nægt hráefni á þessu verði. Svo kemur auðvitað flutningskostnaður uppá fastalandið og hann er töluverður. Svo þetta með körin þau skila sér alltaf 100% frá útlöndum en hér á landi er ástandið skelfilegt í karaskilum. Hvert kar kostar um 60.000.

En lausnin er auðvitað, allan fisk á markað og allir mega bjóða, líka tjallarnir og germanirnir. Svo er það þeirra að koma fiskinum til síns heima

[Valmundur Valmundsson, 10.3.2010 kl. 16:55]

Ps. Fríða.

Svo eru skráð um 120 tonn til útflutnings frá Eyjum í dag. Heildarlöndun í dag er um 320 tonn.

[Fríða Einars (IP-tala skráð) 11.3.2010 kl. 08:32]

Ég var inni á fjölnetinu í gær svo ég sá þetta verð með eigin augum.Er þar að auki verkstjóri í fiskvinnslu og fylgist vel með.Þeir bátar sem voru að bjóða fisk á fjölnetinu í gær voru að mestu frá eyjum og voru að bjóða fiskinn á 549 kr að lágmarki.

Á sama tíma er verið að borga í kringum 300 kr hér fyrir fiskinn markaði.En hvað á þetta ruglverð að þýða 549 ?

Þetta er brjálæði.Mig langar að segja þér eitt.Fengum BErg til að koma og landa í Reykjavík í gær (í fyrsta skipti).Buðum honum 290 kr og þá féllst hann á að koma,enda vissu þeir örugglega að hann fengi lægra verð úti.Til hvers er þessi leikur eiginlega ?Kannski þú vitir meira um það en ég ?

[Valmundur Valmundsson, 11.3.2010 kl. 10:47]

Sæl Fríða.

Flott hjá ykkur að bjóða í aflann hjá Berg. Kannski ættuð þið og fleiri að vera duglegri að bjóða beint í aflann. Hvað heffðuð þið borgað fyrir kílóið ef Bergur hefði landað í Eyjum?

Ein staðreynd. Í þessari viku er landað í Eyjum rúmum 500 tonnum af fiski,  210 tonn af því fara í gáma til útflutnings. Rest er unnin hér eða selt uppá land gegnum fiskmarkaðinn. Við hér í Eyjum höfum verið fremstir í því að byggja upp markaðinn í Englandi og erum stoltir af því. Ef við hættum í einu vetfangi að senda fisk á Humbersvæðið þá missum við kaupendur sem þýðir að færri verða um hituna og verðið lækkar.

Eitt dæmi. Nú fer vertíð í hönd og að líkindum verður ýsumok á Selvogsbankanum og víðar. Þá reyna menn að stýra sókninni og veðja á rétta sölustaði. Oft á þessum tíma hefur ýsuverðið fallið innanlands um allt að helming og því verður að vera hægt að dreifa áhættunni víðar, sem er gert og ekkert athugavert við það.

Það sem helst plagar okkur sjómenn og ykkur sem verkið fisk er niðurskurður á kvóta. Handónýtir stjórnmálamenn þora ekki að taka af skarið og auka við veiðiheimildirnar, þeir hafa valdið, það er á hreinu. Kakan minnkar alltaf þrátt fyrir ,,uppbyngarstefnu'' Hafró og nú verður að taka í taumana.

[Fríða Einars (IP-tala skráð) 12.3.2010 kl. 07:59]

Sæll.

Kannski erum við og fleiri búin að vera að bjóða í fisk beint en það er sett svo mikið á hann að það er einfaldlega ekki hægt að kaupa hann.

Og það að vera stoltur af því að byggja upp markað í Bretlandi skil ég ekki.Þegar vantar fisk í ykkar heimalandi.

Það er fáránlegt að þessi fiskur skuli ekki fara á markað á Íslandi.Þar eru Bretarnir að bjóða í hann og þið fáið bæði okkur og þá til að bjóða í.En eins og þetta er í dag erum við útilokuð.

Af hverju er það í lagi að fólk á Íslandi fá ekki vinnu við viskvinnslu á meðan þið haldið uppi vinnu í Bretlandi.

Þetta er þjóðareign sem þið eruð að braska með.

Þú talar um að það plagi okkur og ykkur sjómenn að það vanti meiri kvóta.En ef þessi fiskur sem fluttur er beint út væri í boði þá væri málið allt öðruvísi fyrir okkur.

[Valmundur Valmundsson, 12.3.2010 kl. 10:08]

Sæl Fríða mín.

Tókstu ekki eftir því sem ég sagði áður. Allan fisk á markað á Íslandi og allir mega bjóða, líka tjallarnir. Það er draumur allra sjómanna.

 Þetta með kvótann er staðreynd. Eftir því sem minna má fiska minnkar kakan. Þá verður minna hjá öllum. Svo ef við skoðum útflutning á ferskum fiski þá er magnið að minnka jafnt og þétt, þannig að vinnslan á Íslandi virðist vera að sækja í sig veðrið, enda gengið að hjálpa til í þeim efnum.

Eigum við bara að kassera markaðnum í Bretlandi si svona? Ég fullyrði að ef ekki væri fyrir þennan markað þá væru margar útgerðir hér farnar veg allrar veraldar og það eru útgerðir sem eru gamalgrónar og ekki í neinu helvítis braski. Þá er nú betur heima setið en af stað farið. Við Eyjamenn  höfum borið gæfu til að halda í okkar heimildir og ef ekki væri fyrir útflutninginn værum við nokkrum útgerðum fátækari og þar af leiðandi miklu minni atvinna fyrir alla, bæði sjómenn og landverkafólk.

Við erum góð í því sem við erum að gera og aðrir góðir í því sem þeir eru að gera. Smá grein eftir Binna í Vinnsló. Þó við Binni séum ekki alltaf sammála er þetta nokkuð skörp greining hjá honum.

http://www.eyjafrettir.is/frettir/2010/03/11/nytum_soknarfaerin_eda_kollum_yfir_okkur_stodnun